Ua pastorala tau fondator de Saint-Louis

La vila de Saint-Louis (Estats-Units) que compta un pauc mei de 300 000 poblants mentre que la soa aglomeracion ne recampa quasi dètz còps mei. Qu'ei situada dens l'Estat deu Missouri qui avó ua tradicion comerciau abans de desvolopar ua activitat d'industria militara hòrta après la segonda guèrra mondiau. A la basa, la vila independenta de Saint-Louis n’èra pas mei qu’un comptador comerciau especializat dens lo comèrci perissèr. Qu'estó fondat en partida per un natiu de la vath d'Aspa, lo 14 de heurèr de 1764 : Pierre Laclède. Qu'estó forçat de partir tà las Americas, puish que n'èra pas l'ainat e que ne podèva pas eretar de las tèrras familiaus. Qu'arribè dens lo pòrt de la Navèra-Orleans en 1755.

Tà marcar lo 250au aniversari de la fondacion de Saint-Louis, lo maire de Bedós qu'a demandat a l'associacion deus Amics de Pierre Laclède de har ua pastorala en omenatge ad aquera gran figura locau. Acostumada a har frescas istoricas d’aqueth ordi, l'associacion que mobilizarà un centenat de personas. Que i averà actors, cantaires e dançaires dab vint personas benevòlas encargadas de la logistica. La pastorala Pierre Laclède que's debanarà los 4 e 5 d'aost a 21 h a Bedós.

Informacions : 05 59 34 57 57 

www.pastoralepierrelaclede.fr

Bouton Haut de page