Lo centre Image/Imatge qu'a mudat

Aqueth bastiment, edificat en 1935, qu'a servit hèra. A l'emplaçament actuau deu centre d'art Image/Imatge, carrèra de Vilhèra a Ortès, que i avó prumèr un cinèma. Mes, au cap de quaranta ans, lo cinèma Febus qu'estó barrat. L’endret qu’estó en seguir centre de tria postau puish ua botiga qui barrè a la fin deu decenni precedent. Entau centre d'art Image/Imatge, qui començava de sentí's drin a l'estret dens los sons ancians locaus, quina escadença ! Aqueth ostau que seré l'endret ideau entà har descobrir l'art contemporanèu a la populacion.

L'associacion gestionària deu centre qu'a portat un projècte de reabilitacion de l'ancian cinèma enter 2011 e 2013. Pendent tot aqueth temps, los tribalhs que mobilizèn uas 150 personas benevòlas, aubergadas e neuridas peu monde de l'associacion. Lo projècte qu'a beneficiat deu sostien financèr de donadors privats mes tanben deu Conselh generau, de la vila d'Ortès, de la region Aquitània e de la resèrva parlamentària deu deputat locau. Inaugurat lo 9 de noveme de 2013, lo centre d'art qu'arcuelhó prumèr las òbras deu plastician Paul Pouvreau (fòto). Qu'expausa adara las de Loïc Raguénès en partenariat dab lo Frac de Bordèu e l'artotèca de Peçac. Aquera mustra d'art fotografic qu'i serà en plaça dinc au 3 de mai.

Bouton Haut de page