Las Arts de la carrèra qui vienen tà casa

L'associacion Lacaze aux sottises qu'estó creada en 2009. La soa vocacion qu'ei d'espandir las arts de carrèra e las arts deu circ en miei rurau. En quate ans d'existéncia, que s'ei escaduda a miar tres projèctes culturaus qui aucupan la soa activitat pendent tota l'annada.

Que i a prumèr l'arcuelh d'artistas professionaus en residéncia dab un espectacle a la clau entau public deu Bearn deus Gaves. Segond, qu'organizan espectacles dab proposicions artisticas en respóner a aperets a projècte deu Conselh generau. Enfin que i a la Fêtes des sottises, hestenau de las arts de la carrèra e deu circ que'n hasón augan la cinquau edicion. « Qu'avem volut portar ua navèra proposicion artistica suu territòri » ce ns'explica l'encargada de produccion Fanny Griffon. « Lo public qu'ei au rendetz-ve alavetz qu'èm plan contents d'aver avut l'enveja e las oportunitats entà aviar un tau projècte per aqueth parçan. » Los sòcis d'aquera associacion n'an pas hami d'estancà's aquiu. Las ideas entà desvolopar las accions ne mancan pas. L’ambicion qu'ei de poder apitar ua sason culturau sancèra en mei deu tribalh d'arcuelh de residéncia, d'organizacion d'operacions e de l'organizacion deu hestenau. « Que permet d'anar tostemps au davant deu public, ce horneish Fanny Griffon, nosauts que vienem a lor, suu lor espaci public entà qu'encontren l'espectacle viu ».

Bouton Haut de page