Pyrénées-Atlantiques - Le territoire

Geografia

Bordats a l’oèst per l’ocean Atlantic e au sud per la cadena pirenenca, los Pirenèus Atlantics (Bearn e Bascoat) que son marcats per aquera dobla influéncia. Ad era que s’aprenen lo lor riquèr en paisatges, lo lor clima doç e la complexitat de la lor istòria.

Au sud, la montanha qu’auhereish ua grana varietat de sites excepcionaus : pics ennevats, olas immensas, angosts estrets, lacs, espalungas e cascadas que’s hèn rampèu, paisatges plaserós au rondalejaire. Mei de la mieitat deus passatges transpirenencs que’s hèn peus Pirenèus Atlantics (Sompòrt, Endàia). Que son la marca de la tradicion d’escambis e d’encontres. Atau medish, lo departament qu’ei lo lòc de convergéncia deus camins de Sent Jaques de Compostèla : Òstavath, La Comanda, Irissari, l’Espitau Sent Blasi, Senta Gràcia… que son autandes testimònis d’aqueth passat d’arcuelhença.

Au nòrd, lo pèmont pirenenc qu’ei un parçan de costalats e d’arribèras qui los gaves alargueishen en planas. Vitatges, milhòc, neurissatge e boscatges qu’altèrnan en ua mosaïca de petits bens agricòlas qui dan au paisatge un agradament indenegable.

A l'oèst, au hons deu gòlfe de Gasconha lo departament que s’aubreish sus l’immensitat deu monde. Trenta dus quilomètres de costèra sonque, mes qui auhereishen longas peladas de sable fin, puish de hauts bauç traucats per ansas arrocassosas com a Biàrritz o Sent Joan de Lus, o per la larga baia d’Endàia. Ua frinèsta ubèrta entà l’esperit deus pirenencs e la lor cultura neurida de diversitats. L'Atlantic que balha tanben au departament un clima doç e equilibrat, e ua bona pluviositat propícia a l'agricultura. Ua frinèsta ubèrta tà l’aventura entaus marins bascos caçadors de baleas o pescadors d’aton qui descobrín lo Monde navèth e entrainèn darrèr eths l’emigracion deus nostes aulhèrs. Ua frinèsta ubèrta entà las produccions horastèras, lo milhòc o lo sofre de Lac.

Bouton Haut de page