Pyrénées-Atlantiques - Le territoire

Economia

Lo territòri

L’EFICIÉNCIA E LA TECNOLOGIA

Un jaç de riquessas

Dab 664 000 abitants, lo departament deus Pirenèus Atlantics que representa lo tresau pòle economic e demografic deu Sud-Oèst gran, au costat de Bordèu e Tolosa. Duas recentas revolucions qu’an propulsat la soa economia de cap tau sègle XXIau : la cultura deu milhòc, dens l’aprèsguèrra, seguida per la descubèrta deu jaç gasèr de Lac, lo mei important de França, espleitat a comptar de la fin de las annadas 50.

Per çò qui ei de l’agricultura, lo departament qu’ei lo prumèr productor nacionau de hromatge d’aulha, lo segond entau milhòc gran. Qu’ei lo prumèr d’Aquitània en nombre de bens agricòlas. Lo sector agroalimentari que i tien ua plaça màger dab los vins e jambons, hitges gras e hromatges, mes atau medish los chicolats deus quaus Baiona ei la capitala istorica.

Lo pòrt comerciau de Baiona, ubèrt tà l’Atlantic, que constitueish un aute atot de desvolopament economic màger, a qui hèn còrda los aeropòrts de Pau-Pirenèus e Biàrritz-Anglet-Baiona.

Enairada en punta

Dens l’airau de l’industria, lo departament que benefícia mei que mei de l’implantacion deu grop Total, ancianament Elf Aquitània, qui en especiau a permetut, per la soa fòrça d’entrainament, lo desvolopament de la recèrca e de las tecnologias de punta. L’aeronautica que constitueish un aute pòle d’excelléncia industriau. Un important hialat de sostractants que’s mau a l’entorn deus leaders mondiaus Turbomeca, Dassault o Messier-Dowty. Ne i a pas guaire, los Pirenèus Atlantics que’s son engatjats en ua afranquida novatora de desvolopament economic. Dab lo projècte Nature &Technology, que s’ageish de har deu departament ua « petita California deu Sud-Oèst », virada tà l’innovacion e las geosciéncias, qui hasca l’acès d’industrias de punta preocupadas per ua afranquida environamentau. Au centre d’aqueth projècte que’s tròba lo concèpte d’avion verd. Aqueste aparelh de las annadas venideras, qui ne consumirà pas tant de carburant e serà mei ecologic, entà s’enairar que trobarà ací un hialat qualificat de sostractants e cellulas de recèrca, au còr de l’Aerospace Valley, pòle mondiau de competitivitat qui s’esten de Bordèu a Tolosa.

Andada navèra

Totun, un navèth nuclèu economic que prava uei lo dia dens los Pirenèus Atlantics, portat per la vòga deus espòrts d’eslissada e las lors marcas internacionaus. Los leaders mondiaus deu sector que causeishen de s’installar suu litorau atlantic.

Bouton Haut de page